Нийслэлийн байгаль орчны газраас олон нийтийн байгууллагатай хамтран модонд уясан хадаг, байгальд сөрөг нөлөө үзүүлэхүйц байдлаар байрлуулж орхисон шашны эд хэрэглэлийг цэвэрлэхээр боллоо. 

Шашны эд зүйлсийг байгалиас цэвэрлэх ажлыг энэ сарын 19-нд зохион байгуулах ба шаардлагатай эд, хэрэгслээ авахыг иргэдэд анхаарууллаа. 

Модонд хадаг уяснаар мод ургаж бүдүүрэх явцад чангарч их бие рүү нь шигдэн орж, шим шүүс тархахыг нь зогсоосноор үхдэг байна. Тиймээс сүүлийн жилүүдэд байгальд орхисон шашны эд зүйлсийг цэвэрлэх ажлыг зохион байгуулж байгаа ба 2017 онд Нийслэлийн байгаль орчны газар, Монголын бурхан шашинтны төв Гандантэгчэнлин хийд, Монголын бөөгийн нэгдсэн эвлэл цэвэрлэсэн юм. 

Нийт 13 га орчим талбайгаас таван портер хадаг, шашны эд хэрэглэлийг устгалд оруулж, цэвэрлэсэн байна.