Өдрийн Тойм - Чухлыг тоймлоно

                                       

Бид тоймлоё, Та унш

2019.09.18 Лхагва                                    20°C  2,670.51  Сайн нөхөртэй нөхөрлөнө

Чухлыг тоймлоё 


Эрдмийн өргөөнд нуугдсан хар тамхичид 

Гадаад хэлний гүнзгийрүүлсэн сургалттай, хувийн сургуульд багшлахаар Монголд ирсэн Их Британий иргэнийг хар тамхи хэрэглэсэн байхад нь баривчиллаа. Сэжигтэн 41 настай, эрэгтэй бөгөөд баривчлагдах үедээ 6 гр мансууруулах бодис хадгалж байжээ. Одоогоор хэргийн мөрдөн шалгах ажиллагаа үргэлжилж байгаа ба түүнийг яллагдагчаар татаж, хилийн хориг тавьсан байна. 

Зорилгоо умартсан зочид 

Өнгөрсөн 1 сард англи хэлний сургалтын төвд багшилж байсан Нигерийн иргэн Тайландаас ₮300 саяын үнэ бүхий хар тамхи шуудан илгээмжээр оруулж ирснийг илрүүлсэн юм. Мөн хамгийн сүүлд буюу 9/7-нд DJ хийхээр Монголд ирсэн Германы 2 иргэн хар тамхи хэрэглэсэн байсныг илрүүлжээ. 

Тойм 

Он гарсаар хар тамхины хэрэгт 319 хүн холбогдсоны 80% нь 18-35 насныхан байгаа юм. Тодруулбал, ЕБС-ийн 6 сурагч, 23 оюутан хар тамхины хэрэгт холбогдоод байна. Өнгөрсөн онд энэ төрлийн гэмт хэрэгт холбогдсон хүмүүсийн хамгийн бага нь 13 настай байсан ба манай улсын 22 иргэн гадаадад хар тамхины хэргээр ял эдэлж байгаа юм.


Зуслангийн чиглэлийн замыг хаана 

Сэлбэ дэд төвийг Чингэлтэй төвтэй холбох ажлын хүрээнд 5 буудлаас 7 буудал хүртэлх замыг энэ амралтын өдрүүдэд хаахаар боллоо. Иймд тус чиглэлд зорчих иргэдийг бусад замаар хөдөлгөөнд оролцохыг анхааруулж байна. Мөн зуслангийн чиглэлд зорчих иргэд бидний нэрлэж заншсанаар Хайлаастын замаар Чингэлтэй рүү давж, гэр хороолол дундуур явснаар зуслангийн замд орох боломжтой юм. 


Шүгэл үлээцгээе

Авлигын эсрэг хуульд нэмэлт оруулах хуулийн төслийг УИХ-ын дарга санаачилж, намрын чуулганаар хэлэлцүүлэхээр боллоо. Хуулийн төсөлд авлигын асуудлаар ирүүлсэн мэдээлэл үнэн болох нь тогтоогдвол АТГ-т хураагдсан бэлэн мөнгө, эд хөрөнгийн 10%-тай тэнцэх мөнгөн урамшууллыг мэдээлсэн этгээдэд олгохоор тусгажээ. Хагас жилийн байдлаар авлигын гэмт хэргийн улмаас улсад ₮11 их наядын хохирол учирсан байна.


Монголд хийгдсэн Солонгос кино үзэх нь...

Хайрын ослын буулт гэх СОАК-ны зураг авалтыг Монголд хийхээр болжээ. Улмаар Хюн Бин, Сон И Жин зэрэг Солонгосын алдарт жүжигчид манай улсад ирсэн ба кинонд 2 Солонгосын иргэдийн хайр дурлалын тухай өгүүлэх юм. Зураг авалтын эхний хэсгийг Швейцарт хийсэн бөгөөд кино энэ сарын сүүлээр дэлгэцнээ гарна.


Электрон тамхинаас татгалзъя

Сүүлийн үед тамхинаас гарахын тулд электрон тамхи хэрэглэдэг залуус олширч байгаа юм. Гэвч энэ нь уушгины үрэвсэл, архаг бронхит, хатгаа үүсгэх магадлалтай байна. Учир нь электрон тамхины шингэнд агуулагддаг никотин, пропилений гликол, алдегид гэх бодис нь уур болон хувирснаар уушгины эд эсэд шархлаа үүсгэдэг аж. Мөн судалгаанаас үзэхэд электрон тамхи хэрэглэдэг хүүхдүүд жирийн тамхи татах магадлал өндөр байдаг гэнэ.

Таны сонорт


Image result for card icon Шахмал түлшний картыг харьяа хороогоор дамжуулан үнэ төлбөргүй олгож байна. 

Өдрийн тойм Статистик


Өдрийн тойм Сошиал    


Зохиогчийн эрх © 2018 Өдрийн Тойм, Бүх эрх хуулиар хамгаалагдсан

Холбоо барих:
+976-76000078
info@udriintoim.mn
Монгол, Улаанбаатар, СБД, Сүхбаатарын талбай, Эрдэм Тауэр

ЭНЭ ӨДРИЙН ТОЙМ