ДОХ-ын эсрэг өдөр 12 сарын нэгэнд тохиох гэж буйтай холбоотойгоор ЭМЯ-аас мэдээлэл хийлээ. Энэ онд тус өдрийг Өөрчлөлтийг та бид хийнэ уриан дор зохион байгуулах юм. 

Манай улсад ХДХВ-ийн халдварын эхний тохиолдол 1992 онд бүртгэгдсэн ба энэ оны 10 сарын байдлаар ХДХВ, ДОХ-ын 281 тохиолдол илэрсэн байна. Үүний 32 нь нас барсан бөгөөд ХДХВ, ДОХ-той хүний жилд хэрэглэх ретровирүсийн эсрэг эмчилгээнд 1.5-4 сая төгрөгийг зарцуулдаг гэнэ. 

Харин ХДХВ-ийн халдвар эхээс хүүхдэд дамжихаас сэргийлэх эмийн зардалд жилд 2.5-3 сая төгрөгийг зарцуулдаг байна. ХӨСҮТ-ийн тооцоолсноор Монголд 615 хүн ХДХВ-ийн халдвартай байх магадлалтай байгаа юм. 

Одоогоор ХДХВ, ДОХ-ын тусламж үйлчилгээ авч буй хүмүүсийн 87 хувь нь ретровирүсийн эсрэг эмчилгээнд хамрагдаж, 79 хувьд ХДХВ-ийн ачаалал дарангуйлагдсан байна. ХДХВ-ийн халдварын тохиолдлын 81.2 хувь нь эрэгтэйчүүд байгаа ба тэдний 80 хувь нь бэлгийн цөөнх хүмүүс гэнэ. 

Ретровирусийн эсрэг эмчилгээг 2003 оноос нэвтрүүлсэн бөгөөд 2003-2013 онд Глобаль сангийн дэмжлэгтэй ДОХ-ын төслөөс 94.919 долларын санхүүжилт авсан байна. Мөн 2013 оноос эм, оношлуурын зардалд жил бүр 300-500 сая төгрөгийг улсын төсвөөс гарган, эмчилгээ, оношилгоо, тусламж үйлчилгээнд хэрэглэж байгаа юм. 

Дэлхийн хэмжээнд өнгөрсөн оны байдлаар ХДХВ-ийн халдвартай 37.9 сая хүн амьдарч байна.